CVO Brandwag

Integrasie in skole werk nie

2008-11-18T07:34:00.000-08:00

Die akademiese jaar loop vinnig ten einde. Matrikulante is besig met hulle laaste skooleksamens, en ouers wat kleintjies vir die eerste keer skool toe moet stuur, staan nou voor die keuse oor na welke skool die gesin se kosbaarste besitting gestuur moet word.

In menige ouer is daar die kommer oor wat deesdae op die skole gebeur: wat word my kind daar geleer, hoe goed is die standaarde en beteken dit nog enigiets vir my kind se toekoms? En dan is daar die vrae oor veiligheid by die skole, in die lig van al hoe meer berigte van aanrandings, skêrstekery en selfs verkragtings in die skole.

Byna daagliks is daar berigte oor polisieklopjagte by skole, om te soek na versteekte wapens en dwelms. Die probleme met die handhawing van dissipline is bronne van kommer vir ouers, want gewoonlik word die swak dissipline van die skole saamgebring huis toe om ook vir die ouers geweldige hoofbrekens te besorg.

Ons het deur die jare telkens die oorsaak vir al hierdie probleme voor die deur van die multikulturele, geïntegreerde skole, gelê. Maar omdat dit as eksklusiwiteit en ‘n voortsetting van apartheid gesien is, is daar natuurlik nie na geluister nie.

Maar die waarheid het die neiging om altyd te oorwin, en die realiteit van die dag kan op die lange duur nie geïgnoreer word nie.

Die lig oor die land se chaotiese onderwysbedeling begin nou by verskeie opvoedkundiges deurbreek.

Een van die omstrede akademici, met wie ons al hewig verskil het oor van sy uitsprake, prof. Jonathan Janssen, begin nou ook te twyfel of rasse-integrasie in die skole ‘n goeie ding is. Hy baseer dit daarop dat dit lei tot die verlaging van standaarde. Waar hy, volgens ons, egter nie korrek is nie, is dat hy reken dat die invoer van armer swart kinders na middelklas-skole die rede is, en hy heg ‘n welstands- of rykdomskriterium aan die verskille, in plaas van die kultuurverskille, wat ons reken die rede vir die probleem is. Hy sê integrasie lok nie swak middelklasleerlinge nie, maar werkersklasleerlinge wat in wanfunksionele skole in die swart gebiede was.

Dit is dus presies waar die dissiplineprobleem in die skole vandaan kom. Dit word ondersteun deur professor Johan Beckman van die Universiteit van Pretoria, wat sê dat integrasie bydra tot ‘n gebrek aan dissipline en waardes. En die afbreek van waardes is tog iets wat vir ons as Christen-Afrikanerouers onaanvaarbaar is, omdat dit die fondament van opvoeding en bestaan is.

Intussen is daar gerugte in die ANC dat die Uitkomsgebaseerde Onderwys weer bekyk moet word, en as dit nodig is dat dit verwyder moet word, dit desnoods moet gebeur.

Helaas is dit so dat die staat ‘n politieke agenda het. By landbou word nie gekyk na voedselsekerheid nie, maar na ‘n politieke agenda van herverdeling van grond. Daarom is ons ook nie besonder opgewonde dat die regering sal luister na die mening van kundiges in onderwys nie, want hulle het ‘n politieke agenda wat gevolg moet word. Daardie agenda bepaal dat integrasie moet plaasvind, ongeag die uitkoms daarvan. Daardie agenda bepaal dat daar geen geskeide skole mag wees nie, want dit sal die vermoë van sekeres, en die onvermoë van ander beklemtoon, en sê nou net daardie verskille sou ‘n rasse-patroon uitwys...

Daarom, as u nou voor die besluit staan oor waar u kind volgende jaar heen moet gaan, oorweeg hierdie sake. Maar moet u nie laat mislei of u daaraan troos dat daar “gekyk” word na moontlike veranderinge nie. Moenie u kind voor die wolwe gooi, en hoop dat die wolf nie sy bek sal oopmaak om hom te verslind nie, of in die hoop dat daar dalk ‘n ander prooi vir hom sal verskyn nie. U kan nie so met die toekoms van u kind dobbel nie.

http://www.radiopretoria.co.za/Nov17SkoleIntegrasie.html

Berig in 'Op jou Voorstoep"

2008-11-03T01:03:00.001-08:00

UGO Misluk

2008-10-29T23:59:00.000-07:00

Die BCVO neem met vreugde kennis van die verklaring van Me. Mamphele Ramphele voormalige Visie-Kanselier van die Universiteit van Kaapstad en Direkteur van die Wêreldbank dat Uitkoms Gebaseerde Onderwys moet uit! So is op 28 Oktober deur Ella Smook in Daily News gepubliseer.

Die BCVO het met nadruk en by herhaling al op die onbybelsheid van die metode sowel as die opvoedkundige ellende wat die onderrigmetode bring gewys! Daarom dat die BCVO steeds op kennisgedrewe onderrig aandring en toepas!

Me. Ramphele sê nou: “I am prepared to march to parliament. We must do away with outcomes-based education. It has failed our nation. It has failed our children" . Hoewel ons dankbaar is dat daar nou ‘n hooggeplaaste uit die akademiese- en handelswêreld is wat bereid is om dit hardop te sêselfs bereid is om parlemente toe te “toy-toy” hulle nie na al die verdoemende wêreldwye kommentaar en waarskuwings wou luister toe dit gelewer was nie. Nou dat die nasie en kinders klaar daaronder moes lysoos voorspelwil sy marsjeer!

Die BCVO roep tot alle verantwoordelike ouers om te luister en hulle kinders in te skryf by die BCVO wat deur die genadige voorsiening van die Vader ‘n reeds ontwikkelde stelsel het en enigste ware alternatief vir die ellende in die staat se onderwys.

Gideon Grobler
Voorsitter van die BCVO Direksie

Kennisgedrewe teenoor UGO

Wees opnuut bewus van die verskille tussen UGO en kennisgedrewe onderwys sodat u dit kan uitken. Kom ons vat die leermetodes kortliks saam ter wille van weer onthou en as ons kinders dit ook kan verstaan soveel beter.

Uitkoms gebaseerde onderwys (UGO) se groot kenmerk is eintlik dat niemand mag weet waarheen is ons oppad nie. Bietjie meer akademies gestel: UGO is per definisie nie definieerbaar nie. Dr. Bray van Kanada wat hier in die ontstaansjare van UGO die owerheid se amptelike raadgewer was verduidelik UGO so in ‘n toespraak wat hy aan genooides te UNISA gelewer het. Hy sê dit is soos ‘n onderwyser wat met ‘n kind aan die hand in die gang van die skool af stap, nie die kind nie maar ook nie die onderwyser weet waar die paaitjie heen loop nie!

Hierdie metode leer dat die kind gebore word met ‘n sekere potensiaal. Daar moet net vir hom ‘n aangename leeromgewing geskep word sodat hy/sy al ondersoekende sy eie potensiaal ontdek. Daarom noem hulle hom ‘n Leerder en nie ‘n Leerling nie. ‘n Leerling is iemand wat sit en luister na sy leermeester wat hom juis moet voer met kennis wat hy/sy nie het nie. Hierdie kennis moet so ingedril word dat dit sy eie word. Daarom noem ons dit kennis gedrewe onderwys.

In UGO is die leerder self sy eie norm. Hy beskik Dan reeds oor die kennis hy moet dit net ontdek/verder ontwikkel. Daarom kan nie aan die kind(leerder) voorgeskryf word nie, hy moet net begelei word. Hy word ook nie (GE)evalueer nie, maar (GE)assesseer. Hoe kan jy hom evalueer hy is Dan die norm! Jy kan net assesseer om vir hom te sê hoe goed jy dink het hy homself ontdek.

Die Woord leer ons as verbondskinders dat ons van na die sondeval net genoeg goed in onsself oorgehou het dat ons ons nie kan verontskuldig nie. Jn.3:27 (art.14 NGB) Die potensiaal wat ons moet ontdek is ons sondigheid!

Ek moet juis geleer word en wie my ookal leer moet baie seker wees hy weet juis waar gaan hy met my heen: na God toe! Ook deur die wiskunde en fisika! Dit is wat die Woord ons leer.

BCVO Groete
Gideon Grobler

Landswye Landloop 2008

2008-09-29T01:38:00.001-07:00

Landswye Tennis

2008-09-28T00:36:00.000-07:00

Drie van CVO Brandwag se leerlinge het die Sentraal Transvaal streek verteenwoordig by die landswyetenniskampioenskappe wat gehou is op Bethlehem op die 26ste September 2008.

SD Mann het 'n goue medalje ontvang vir sy eerste plek in die seuns onder 19 afdeling.

Dankie tog vir CVO skole

2008-08-19T04:17:00.000-07:00

Die nuus van die satanistiese kind wat by 'n skool in Krugersdorp 'n ander kind gedood het met 'n swaard het 'n skudding veroorsaak.

Verskeie verwyte word rond gegooi oor die redes vir die "aanval". Die DA se woordvoerder reken dit is die skool se skuld aangesien die skool se sekuriteit nie na wense is nie. Daar is persone wat van mening is dat dit die ouers se skuld is. Dat die ouers die kind nie moes toelaat om na sekere musiek moes luister nie.

Ek is egter van mening dat dit die ANC se skuld is. Die ANC het ons eens Christelike staatskole verander in satansneste.

Hierdie insident is ook nie ge-isoleerd nie. Krugersdorp staatskole was die afgelope tyd heelwat in die nuus. Daar was die vyftienjarige Lizelia Joubert van Hoërskool Jan de Klerk, wat vir 15dae opsoek was. Ook was daar die twee meisies wat hulleself opgehang het en in 'n brief verklaar het dat dit vir hulle beter was om hulleself dood te maak as om in die mag van satan te beland.

In die goeie "ou" Suid-Afrika was daar nie sulke probleme nie. Die "nuwe" Suid-Afrika het hierdie probleme veroorsaak. Daarom ook dat CVO skole geskep is, om ons kinders te beskerm teen hierdie gevare.

Dankie tog vir CVO skole!

Kultuurdag te CVO Pretoria

2008-07-27T22:57:00.000-07:00

Leerlinge van CVO Brandwag het deelgeneem aan die kultuurdag wat gehou is by CVO Pretoria. Alhoewel die kompetisie straf was, het ons leerlinge goed gevaar met verskeie goue en silver pryse.

Landloop - Saterdag 19 Julie 2008

2008-07-19T22:42:00.001-07:00

Op Saterdag 19 Julie 2008 was CVO Brandwag die gasheer van 'n vriendskaplike landloop byeenkoms. Atlete van CVO Brakpan en CVO Pretoria het kom meeding en CVO Brandwag het self 18 atlete gehad wat deelgeneem het.

Danie Theron: Een van ons grootste helde.

2008-05-26T04:44:00.000-07:00

Anja Piek Gr6

Ons het op Saterdag 17 Mei 2008 vroeg bymekaar gekom by CVO Brandwag. Vandaar het ons in 'n konvooi na die Danie Theron Monument gery, wat naby Carltonville gelee is. Toe ons by die terrein aankom, was sommiges van ons braaf en het die koppie uitgeklim, terwyl ander minder avontuurlustig was en met motors opgery het na die monument.

By die monument het Oom Chris vir ons meer oor die geskiedenis van Danie Theron vertel. Onder andere het hy ons vertel dat Danie 'n prokureer in Krugersdorp was en dat hy opgestaan het vir die regte van die boerevroue, nadat 'n lelike berig oor die boervrou in 'n engelse koerant verskyn het van daardie tyd.

Hy is aangekla van aanranding op die redakteur van die koerant en moes 20 pond boete betaal. Hierdie boete is deur die boere wat die verhoor bygewoon het betaal.

Hy het besef dat die kommunikasie tussen die vegtende boere nie goed was nie en het die Verkennerskorps gestig. Hy was die stigter en leier van hierdie korps. Dit het bekend gestaan as die Danie Theron Verkenners. Boodskappe is vanaf so ver as Pietersburg reg oor die land geneem. Dit is op een van hierdie lang togte wat hy besef het dat 'n mens baie verder en vinniger per fiets kan ry as per perd. As boodskappe oor kort afstande geneem moes word, is daar steeds van perde gebruik gemaak.

Op 'n keer moes Danie Theron oor 'n lang afstand op sy hande en kniee van die een Generaal na die ander kruip om 'n boodskap deur die Engelse linie te kry.

Die Monument staan op 'n koppie waar Danie verkenning gaan doen het en toe op 'n groep Engelse soldate afgekom het. Met 'n Mauser het hy drie gedood en vier gewond. 'n Engelse generaal, Generaal Hart, het die skermutseling gehoor en gedink daar is 'n hele Boeremag op die koppie. Hy het toe vier gewone kannone en een skeeps kanon op die koppie gerig en daar is Danie Theron gedood.

Die monument is opgerig ter herdenking van Danie Theron en dat almal kan onthou dat hy 'n vegter was vir Afrikaner regte en dat daar in sy hart, die vlam van vryheid hoog gebrand het. Die monument is 50 jaar na sy dood opgerig deur Boeremense wat nog steeds die vlam van vryheid ook in hulle harte voel brand.

Wat 'n wonderlike ondervinding! Ek wens alle Afrikaner-kinders die voorreg kan geniet wat ons het en dat hulle die helde van ons Geskiedenis kan leer ken soos ons hulle leer ken, van mense wat nog vir ons en die geskiedenis omgee.

Terug by die skool het ons 'n Karee-boom geplant ter ere van Danie Theron, sodat ons hier by die skool altyd aan hom sal dink en aan dit wat hy vir ons Afrikaners gedoen het.

Die dag is afgesluit met 'n bring en braai en die brawes onder ons het 'n paar spelle Jukskei gespeel, net om dit gesellig te hou.

Die BCVO Eksamenraad

2008-05-11T23:16:00.000-07:00

Die BCVO-Eksamenraad is in 1996 amptelik erken as eksamineringsliggaam deur die SA-Sertifiseringsraad (SAFSERT).

Die BCVO-Eksamenraad hou toesig oor die afronding van reëlings vir die afneem, nasien en administrasie van die BCVO se Senior Sertifikaateksamen, wat vanaf einde 1997 by geakkrediteerde CVO-skole afgeneem word. Sedert die einde van 1997 het CVO-matrikulante met groot sukses die BCVO se eie SAFSERT-gesertifiseerde senior sertifikaateksamen afgelê. Die standaard van vraestelle en uitslae word ook ekstern gemodereer. (Die nuutgevestigde UMALUSI het sedert 2002 SAFSERT se rol in hierdie verband oorgeneem.)

Etlike van hierdie matrikulante het al suksesvol by verskeie Suid-Afrikaanse universiteite en ander tersiêre opleidingsinstansies hul studie in rigtings soos medies, ingenieurswese, inligtingstegnologie, spraakterapie ens. suksesvol voortgesit en ook al reeds talle merietebeurse en ander toekennings verwerf.

BCVO- EEDSVERKLARING

2008-05-11T23:12:00.000-07:00

Die ouers en lede van die BCVO is dankbaar dat die debat oor die Minister van onderwys aangaande die eedsverklaring nie vir ons kinders ‘n bedreiging sal wees nie!

Lank voor die eedsverklaring ‘n gedagte was, het ons, as ouers, gesien waar sake met die staatsonderwys heen oppad is en hoe stelselmatig die beïnvloeding en indoktronasie toegepas word.

Ons het ‘n ander pad gekies, een van groot opofferings en koste, maar in gehoorsaamheid aan ons verbondsbelofte bring ons die offers.

Ons begin ons skooldag egter sedert die begin van die beweging, nagenoeg vyftien jaar gelede, met ‘n gewyde geleentheid elke dag. ‘n Geleentheid waarin ons nie humanistiese waardes wil bou, soos die minister beoog met die openbareskool kinders nie, maar een van aanbidding voor die Drie-enige God. Een waarin ons nie probeer om ander se foute uit te wys en ons foute ook op hul skouers te laai nie, maar waarin ons, ons eie sonde en skuld erken en bely! Daarna verheug ons ons in die vergiffenis wat ons van ons Here Jesus Christus ontvang het en dank Hom daarvoor.

Ons onderneem ook: om ons dank en eer aan die Hemelse Vader te gee, elke dag met ‘n groter strewe en bid om die genade om elke geleentheid raak te sien waarin ons deur ons dade aan Hom groter eer kan bring!

Ons ‘n eedsverklaring te maak beteken om die ware God, God Drie-enig tot getuie te roep. Hierdie saak het geweldige implikasies vir wie ookal daaraan deel. Ons ag hierdie ‘n uiters onverantwoordelike aksie waarin die Vader tot getuie geroep word! In hierdie aksie, waarin baie min waarskynlik die implikasie verstaan en ook geen beheer het oor die uitvoering daarvan nie.

Gideon Grobler

Voorsitter van BCVO Direksie

SPORT

2008-05-11T10:45:00.001-07:00

Vir Afrikaners is sport belangrik en by CVO Brandwag kry leerlinge die geleentheid om aan verskeie sport soorte deel te neem. Geleentheid tot deelname is vir CVO Brandwag belangrik en daarom kry alle leerlinge gelyke geleentheid tot deelname.
Vir uitblinkers is daar ook die geleentheid om op provinsiale en nasionale vlak deel te neem teen ander CVO skole.

DIE BEWEGING VIR CHRISTELIKE VOLKSEIE ONDERWYS (BCVO)

2008-05-11T10:44:00.001-07:00

CVO Brandwag is saam met 48 ander skole, trotse lede van die BCVO. Die BCVO is ‘n oorkoepelende liggaam wat verantwoordelik is vir kurrikulumontwikkeling, ontwikkeling van studiemateriaal, jaarlikse standaardiseringseksamens vir graad 7, 9, en 11, personeelopleiding, vakadviesdienste en inspeksies van lidskole.
Die BCVO-Eksamenraad is die enigste geakkrediteerde onafhanklike Afrikaanse eksamenliggaam in Suid-Afrika.
Die BCVO-Eksamenraad neem sy tiende matriekeksamen vanjaar af. Dit word met respek erken deur die voorste universiteite, technikons en kolleges.

Geskiedenis en Kultuur

2008-05-11T10:40:00.000-07:00

By CVO Brandwag is dit vir ons belangrik dat ons kinders geleer word van die Afrikaner se eiesoortige geskiendenis en kultuur.

Verskeie kultuuraktiwiteite soos redenaarskompetisies en Volksgeskiedenis word aangebied.

Leerlinge word ook gereeld op uitstappies geneem na geskiedkundige plekke en museums.

CHRISTELIKE BEGINSELS

2008-05-11T10:38:00.000-07:00

Die CVO Brandwag is ‘n Christelike skool geskoei op die Protestante Gereformeerde leer.
Slegs kinders van ouers wat belydende lidmate is van een van die Protestante Gereformeerde kerke sal toegelaat word tot die skool.
Godsdiensopvoeding is ‘n verpligte vak tot in matriek.

WIE IS CVO BRANDWAG?

2008-05-11T10:13:00.000-07:00

CVO Brandwag is ‘n ouerskool wat eienaarskap neem van hulle kinders se opvoeding en dit nie aan die staat oorlaat nie. Die hoekstene van die opvoeding word gevorm deur ‘n Christelike-gereformeerde lewens- en wereldbeskouing, die uitlewing en uitbouing van die Afrikaner se volkseie geskiedenis, kultuur, taal en die verskaffing van gehalte onderwys.
Dit is ons mening dat die staat nie hierdie waardes vir ons kinders bied nie. Inteendeel, hulle waardestelsel is nie Christelik nie en ook volksvreemd. Hierdie waardestelsel word op ‘n subtiele wyse verkoop en bevorder in die staat se leermateriaal.
CVO Brandwag is gebore uit die versigting van Christelik Afrikaner ouers om vir hulle kinders die waardes soos bo genoem te bied.
Die skool bestaan al sedert 1992 en is geakrediteer deur UMALUSI en is geregstreer by die onderwysdepartement.
CVO Brandwag is nie gerig op winsbejag nie en alle fondse wat ge-in word, word aan die skool spandeer. Alhoewel die standaard en gehalte van onderrig die van staatskole by vere oorskry, is die skoolfonds kompenteerend met die van staatskole.